ರಾಮನಗರ : ಕರ್ನಾಟಕ ಹಾಲು ಮಹಾಮಂಡಳಿ (ಕೆ.ಎಂ.ಎಫ್) ವತಿಯಿಂದ ಕೆ.ಎಂ.ಎಫ್. ಅಧ್ಯಕ್ಷರ ತವರು ಜಿಲ್ಲೆಯ ರೈತರಿಗೆ ವಿತರಿಸಲಾಗಿರುವ ಖನಿಜ ಮಿಶ್ರಣದ ಪೊಟ್ಟಣ ಅಸಲಿಯೋ ನಕಲಿಯೋ ತಿಳಿಯುತ್ತಿಲ್ಲ ಎಂದು ಕರ್ನಾಟಕ ರಾಜ್ಯ ರೈತ ಸಂಘ ಹಸಿರು ಸೇನೆಯ ಜಿಲ್ಲಾ ಉಪಾಧ್ಯಕ್ಷ ಕೃಷ್ಣಪ್ಪ ಆರೋಪಿಸಿದ್ದಾರೆ.
    ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು ಮೈಸೂರು ಪ್ರಾಂತ್ಯದ ಏಳು ಜಿಲ್ಲೆಗಳ ಪ್ರದೇಶಕ್ಕನುಗುಣವಾಗಿ ತಯಾರು ಮಾಡಿರುವ ಒಂದು ಕೆ.ಜಿ. ಖನಿಜ ಮಿಶ್ರಣದ ಪಾಕೇಟ್‍ಗಳನ್ನು ಪಶುಗಳ ಉತ್ತಮ ಆರೋಗ್ಯ, ಗರ್ಭಧಾರಣೆ ಮತ್ತು ಹೆಚ್ಚು ಹಾಲು ಉತ್ಪಾದನೆಗಾಗಿ ಕೆ.ಎಂ.ಎಫ್ ಈ ಖನಿಜ ಮಿಶ್ರಣದ ಪಾಕೇಟ್ ತಯಾರು ಮಾಡಿದೆ. ಈ ಪಾಕೇಟ್ ಮತ್ತು ಪ್ಯಾಕಿಂಗ್ ಬಾಕ್ಸ್‍ಗಳ ಮೇಲೆ ಆಗಲಿ ಬ್ಯಾಚ್ ಸಂಖ್ಯೆ, ಪ್ಯಾಕ್ ಮಾಡಿದ ದಿನಾಂಕ ಮತ್ತು ಉಪಯೋಗಿಸುವ ದಿನಾಂಕದ ಅವಧಿ ನಮೂದಿಸಿಲ್ಲ ಇದರಿಂದಾಗಿ ಈ ಪ್ಯಾಕೇಟ್ ಅಸಲಿಯೋ ನಕಲಿಯೋ ತಿಳಿಯುತ್ತಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
    ಕೆ.ಎಂ.ಎಫ್ ವತಿಯಿಂದ ವಿತರಿಸಲಾಗಿರುವ ಖನಿಜ ಮಿಶ್ರಣಗಳನ್ನು ವಾಪಸ್ ಪಡೆಯಬೇಕು, ಬ್ಯಾಚ್ ಸಂಖ್ಯೆ, ಪ್ಯಾಕ್ ಮಾಡಿದ ದಿನಾಂಕ ಮತ್ತು ಉಪಯೋಗಿಸುವ ದಿನಾಂಕದ ಅವಧಿ ಇರುವ ಪ್ಯಾಕೇಟ್‍ಗಳನ್ನು ವಿತರಿಸಬೇಕು, ರೈತರಿಂದ ಪಡೆದ ಹಣಕ್ಕೆ ಸಹಕಾರ ಸಂಘಗಳಲ್ಲಿ ಬಿಲ್ ನೀಡಬೇಕು ಇಲ್ಲದಿದ್ದರೆ ರೈತ ಸಂಘ ಬಮೂಲ್ ಶಿಬಿರ ಕಛೇರಿಯ ಎದುರು ಪ್ರತಿಭಟನೆ ನಡೆಸಬೇಕಾಗುತ್ತದೆ ಎಂದು ಅವರು ಎಚ್ಚರಿಸಿದರು.
    ಜಾಲಮಂಗಲ ಗ್ರಾಮದ ರೈತ ಶಿವನಂಜಯ್ಯ ಮಾತನಾಡಿ ಲಕ್ಷಾಂತರ ರೂಗಳನ್ನು ಖರ್ಚು ಮಾಡಿ ಹಸುಗಳನ್ನು ಖರೀದಿ ಮಾಡಿರುವ ರೈತರಿಗೆ ಇಂತಹ ಇಂದು-ಮುಂದು ಇಲ್ಲದ ಪ್ಯಾಕೇಟ್‍ಗಳನ್ನು ಸರಬರಾಜು ಮಾಡುತ್ತಿರುವ ಕೆ.ಎಂ.ಎಫ್. ರೈತರ ಬಾಳಲ್ಲಿ ಚೆಲ್ಲಾಟವಾಡುತ್ತಿದೆ. ಹಾಲು ಉತ್ಪಾದಕರ ಸಂಘಗಳ ಮೂಲಕ ವಿತರಣೆ ಮಾಡುತ್ತಿರುವ ಕೆ.ಎಂ.ಎಫ್ 40 ರೂ ಹಣ ಪಡೆದರೂ ಅದಕ್ಕೆ ಬಿಲ್ ನೀಡುತ್ತಿಲ್ಲ, ಅಮಾಯಕ ರೈತರಿಗೆ ಇಂತಹ ಪ್ಯಾಕೇಟ್ ವಿತರಿಸಿ ಮೋಸ ಮಾಡುತ್ತಿದೆ. ಈ ಬಗ್ಗೆ ಪಶು ವೈದ್ಯರನ್ನು ಕೇಳಿದರೆ ಖನಿಜ ಮಿಶ್ರಣ ಉಪಯೋಗ ಮಡಬಹುದು ಎಂದು ಹೇಳಿ ಜಾರಿಕೊಳ್ಳುತ್ತಾರೆ ಹಸುಗಳ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಉಂಟಾದರೆ ಯಾರು ಜವ್ಬಾದಾರಿ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
    ಗ್ರಾಮೀಣ ಭಾಗದ ರೈತರು ಅವಿದ್ಯಾವಂತರಾಗಿದ್ದು, ತಿಳುವಳಿಕೆ ಇಲ್ಲದವರಾಗಿದ್ದಾರೆ ಇಂತಹ ರೈತರನ್ನು ಕೆ.ಎಂ.ಎಫ್. ವಂಚಿಸುವ ಕೆಲಸಕ್ಕೆ ಮುಂದಾಗಿದೆ ಈ ಕೂಡಲೇ 7 ಜಿಲ್ಲೆಗಳಲ್ಲಿ ವಿತರಿಸುವ ಬ್ಯಾಚ್ ಸಂಖ್ಯೆ, ಪ್ಯಾಕ್ ಮಾಡಿದ ದಿನಾಂಕ ಮತ್ತು ಉಪಯೋಗಿಸುವ ದಿನಾಂಕದ ಅವಧಿ ಇಲ್ಲದ ಪ್ಯಾಕೇಟ್ ಗಳನ್ನು ಹಿಂಪಡೆದು ಕಷ್ಟದಲ್ಲಿರುವ ರೈತರಿಗೆ ನೆರವಾಗಬೇಕೆಂದು ಒತ್ತಾಯಿಸಿದ್ದಾರೆ.
    ಈ ಸಂದರ್ಭದಲ್ಲಿ ರೈತ ಸಂಘದ ಜಿಲ್ಲಾ ಸಂಚಾಲಕ ನಂಜಪ್ಪ, ಕಾನೂನು ಸಲಹೆಗಾರ ಕೆಂಪೇಗೌಡ, ರೈತ ಮುಖಂಡ ಶಿವಶಂಕರ್ ಮತ್ತಿತ್ತರರು ಹಾಜರಿದ್ದರು.